મુંબઈ: બોલિવૂડના ‘નવાબ’ સૈફ અલી ખાન ફરી એકવાર ખાખી વર્દીમાં મોટા પડદે ધમાલ મચાવવા તૈયાર છે. લોકપ્રિય વેબ સીરિઝ ‘સેક્રેડ ગેમ્સ’માં સરતાજ સિંહના પાત્રથી પ્રેક્ષકોના દિલ જીતનાર સૈફ લગભગ આઠ વર્ષ બાદ ફરીથી પોલીસ ઓફિસરના અવતારમાં જોવા મળશે. નેટફ્લિક્સ ઇન્ડિયાના આગામી પ્રોજેક્ટ ‘Kartavya’ (કર્તવ્ય)નો ફર્સ્ટ લુક સોશિયલ મીડિયા પર રિલીઝ કરવામાં આવ્યો છે, જેણે સિનેપ્રેમીઓમાં ભારે ઉત્તેજના જગાવી છે.
Kartavya: શાહરુખ ખાનના પ્રોડક્શન હાઉસ અને નેટફ્લિક્સનો મેગા પ્રોજેક્ટ
મંગળવારે મુંબઈમાં આયોજિત ‘નેક્સ્ટ ઓન નેટફ્લિક્સ ઇન્ડિયા’ ઈવેન્ટ દરમિયાન વર્ષ 2026ના લાઇન-અપની જાહેરાત કરવામાં આવી હતી. આ યાદીમાં સૌથી વધુ ચર્ચિત પ્રોજેક્ટ ‘Kartavya’ રહ્યો છે. આ એક્શન-થ્રિલર ફિલ્મનું નિર્માણ શાહરુખ ખાનની કંપની ‘રેડ ચિલીઝ એન્ટરટેઈનમેન્ટ’ દ્વારા કરવામાં આવ્યું છે. ફિલ્મનું દિગ્દર્શન પુલકિતે કર્યું છે, જેમણે અગાઉ ભૂમિ પેડણેકર સ્ટારર ‘ભક્ષક’ જેવી ગંભીર ક્રાઈમ થ્રિલર આપી હતી.
પોતાના નવા પ્રોજેક્ટ વિશે ઉત્સાહ વ્યક્ત કરતા સૈફ અલી ખાને જણાવ્યું હતું કે, “કર્તવ્ય એક શાનદાર ફિલ્મ છે. રેડ ચિલીઝ અને નેટફ્લિક્સ સાથે કામ કરવાનો અનુભવ અદભૂત રહ્યો છે. ડાયરેક્ટર પુલકિતે આ વાર્તાને ખૂબ જ સુંદર રીતે આકારી છે અને મને આનંદ છે કે આ ફિલ્મ ટૂંક સમયમાં પ્રેક્ષકો સમક્ષ આવશે.”
રિપોર્ટ્સ અનુસાર, ‘Kartavya’ ભારતની હાર્ટલેન્ડ (ગ્રામીણ અને અંતરિયાળ વિસ્તારો) પર આધારિત વાર્તા છે. જેમાં કાયદો, પરિવાર, સત્ય અને કર્તવ્ય વચ્ચેના સંઘર્ષને વણી લેવામાં આવ્યો છે. એક પોલીસ અધિકારી જ્યારે તેના અંગત મૂલ્યો અને વ્યાવસાયિક ફરજ વચ્ચે ફસાય છે, ત્યારે સર્જાતી પરિસ્થિતિ આ ફિલ્મનો મુખ્ય પ્લોટ હોવાનું મનાય છે.
OTT પ્લેટફોર્મ પર સૈફનો દબદબો
સૈફ અલી ખાન બોલિવૂડના એવા પ્રથમ એ-લિસ્ટ સ્ટાર્સમાંથી એક છે જેમણે OTT પ્લેટફોર્મની ક્ષમતાને વહેલી ઓળખી લીધી હતી. ‘સેક્રેડ ગેમ્સ’માં પોલીસ ઓફિસર સરતાજ સિંહના પાત્રે ભારતમાં વેબ સીરિઝનો પાયો મજબૂત કર્યો હતો. ત્યારબાદ ‘તાંડવ’ અને ‘વિક્રમ વેધા’ જેવી ફિલ્મોમાં તેના અભિનયની ખૂબ પ્રશંસા થઈ હતી. હવે ‘Kartavya’ દ્વારા તે ફરી એકવાર ડિજિટલ સ્પેસમાં પોતાનું વર્ચસ્વ સાબિત કરવા તૈયાર છે.
જોકે નિર્માતાઓ દ્વારા હજુ સુધી ફિલ્મની ચોક્કસ રિલીઝ ડેટ જાહેર કરવામાં આવી નથી, પરંતુ વર્ષ 2026ના પ્રથમ છ મહિનામાં તે સ્ટ્રીમ થાય તેવી પ્રબળ શક્યતા છે. ક્રાઈમ થ્રિલર જોનારા દર્શકો માટે સૈફ અલી ખાન અને રેડ ચિલીઝનું આ કોમ્બિનેશન ચોક્કસપણે એક નવો માપદંડ સ્થાપિત કરશે. ‘સેક્રેડ ગેમ્સ’માં સૈફનો જે ઠાવકો અને ગંભીર અંદાજ જોવા મળ્યો હતો, તેનાથી પણ વધુ ધારદાર પર્ફોર્મન્સ ‘Kartavya’માં જોવા મળશે તેવી અપેક્ષા ફિલ્મી વિવેચકો રાખી રહ્યા છે.
