અમદાવાદ સ્થિત પ્રિવેન્શન ઓફ મની લોન્ડરિંગ એક્ટ (PMLA)ની વિશેષ અદાલતમાં ED દ્વારા આ ચાર્જશીટ (Prosecution Complaint) દાખલ કરવામાં આવી છે. આ તપાસનો પ્રારંભ અમદાવાદ સાયબર ક્રાઇમ પોલીસ સ્ટેશનમાં નોંધાયેલી એફઆઈઆરના આધારે કરવામાં આવ્યો હતો. જેમાં આરોપ હતો કે મેજિકવિન પોર્ટલ દ્વારા ICC મેન્સ T20 વર્લ્ડ કપ 2024ના પ્રસારણ અધિકારોનું ઉલ્લંઘન કરીને ગેરકાયદે લાઈવ સ્ટ્રીમિંગ કરવામાં આવ્યું હતું અને તેના દ્વારા કરોડોનો સટ્ટો રમાડવામાં આવ્યો હતો.
Magicwin Online Betting Case: પાકિસ્તાની માલિકો અને દુબઈથી સંચાલન
EDની તપાસમાં ચોંકાવનારો ખુલાસો થયો છે કે ‘મેજિકવિન’ વેબસાઇટ યુનાઇટેડ કિંગડમ (UK)માં નોંધાયેલી કંપની ‘મેજિકવિન સ્પોર્ટ્સ લિમિટેડ’ દ્વારા ચલાવવામાં આવતી હતી. આ કંપનીના ડાયરેક્ટર્સ ગુલાબ હરજી મલ અને ઓમેશ કુમાર ગુરનાની પાકિસ્તાની નાગરિકો છે અને હાલમાં તેઓ સંયુક્ત આરબ અમીરાત (UAE)માં સ્થિત હોવાનું મનાય છે. આ પોર્ટલનું સંચાલન દુબઈમાં રહેતા ભારતીય નાગરિકોની મદદથી કરવામાં આવતું હતું.
હવાલા અને ક્રિપ્ટોકરન્સી દ્વારા મની લોન્ડરિંગ
તપાસ એજન્સીના જણાવ્યા અનુસાર, સટ્ટાબાજી દ્વારા એકત્ર કરાયેલા નાણાંના વ્યવહાર માટે ‘મ્યુલ બેંક એકાઉન્ટ્સ’ (ભાડે રાખેલા ખાતા) અને શેલ કંપનીઓનો ઉપયોગ કરવામાં આવતો હતો. સટ્ટાબાજો પાસેથી મેળવેલા નાણાં હવાલા નેટવર્ક અને ક્રિપ્ટોકરન્સી દ્વારા વિદેશ મોકલવામાં આવતા હતા. અત્યાર સુધીની તપાસમાં EDએ વિવિધ શહેરોમાં 68 જેટલા સ્થળોએ દરોડા પાડીને અંદાજે ₹3.55 કરોડની સંપત્તિ જપ્ત અને ફ્રીઝ કરી છે.
સેલિબ્રિટીઝ દ્વારા પ્રમોશન અને ગેરકાયદે ગેમિંગ
આ કેસમાં માત્ર આર્થિક ગુના જ નહીં પરંતુ ગ્લેમર વર્લ્ડના જોડાણો પણ સામે આવ્યા છે. અનેક જાણીતી ફિલ્મી હસ્તીઓ અને સોશિયલ મીડિયા ઇન્ફ્લુએન્સર્સે આ સટ્ટાબાજીની એપ્લિકેશનનું પ્રમોશન કર્યું હોવાનું EDએ તેની તપાસમાં નોંધ્યું છે. આ પ્લેટફોર્મ પર ક્રિકેટ ઉપરાંત કેસિનો ગેમ્સ જેવી કે બેકારેટ, તીન પત્તી, અને પોકર જેવી રમતો લાઈવ ડીલર્સ દ્વારા રમાડવામાં આવતી હતી.
ભારત સરકાર દ્વારા 2025માં રિયલ-મની ઓનલાઇન ગેમિંગ અને સટ્ટાબાજી પર પ્રતિબંધ મૂકવામાં આવ્યો હોવા છતાં, આ પ્રકારના પોર્ટલ્સ યુવાધનને આર્થિક પાયમાલી તરફ ધકેલી રહ્યા છે. ED હાલમાં આ કેસમાં અન્ય સાંકળોને શોધવા અને ગુનાઈત નાણાંના સ્ત્રોત સુધી પહોંચવા માટે ઊંડાણપૂર્વક તપાસ કરી રહી છે. આ કેસ ડિજિટલ યુગમાં સરહદ પારથી ચાલતા આર્થિક ગુનાઓ સામે એક મોટી લાલબત્તી સમાન છે.
