નવી દિલ્હી: ભારતીય ભૂમિસેનાના વડા General Upendra Dwivediએ મંગળવારે વાર્ષિક પત્રકાર પરિષદને સંબોધતા પાકિસ્તાનને આકરા શબ્દોમાં ચેતવણી આપી છે. તેમણે સ્પષ્ટ કર્યું હતું કે ઓપરેશન સિંદૂર (Operation Sindoor) હજુ પણ ચાલુ છે અને સરહદ પારથી થતી કોઈપણ ઉશ્કેરણીનો ભારતીય સેના ‘મુહતોડ’ જવાબ આપવા માટે સજ્જ છે. જનરલ દ્વિવેદીએ જણાવ્યું કે જમ્મુ-કાશ્મીરમાં સુરક્ષા દળોએ આતંકવાદી માળખાને તોડી પાડવામાં મોટી સફળતા મેળવી છે, જેના પરિણામે ખીણમાં હવે સ્થાનિક આતંકવાદીઓની સંખ્યા ઘટીને સિંગલ ડિજિટ (એક આંકડા) માં આવી ગઈ છે.
General Upendra Dwivedi: Operation Sindoor ‘ટ્રાઈ-સર્વિસ’ સંકલનનું પરિણામ
જનરલ દ્વિવેદીએ ઓપરેશન સિંદૂર (Operation Sindoor) ને ભારતનો સીમાપાર આતંકવાદ સામેનો એક મજબૂત અને માપાંકિત પ્રતિભાવ ગણાવ્યો હતો. આ ઓપરેશન ગયા વર્ષે એપ્રિલમાં પહેલગામમાં થયેલા આતંકવાદી હુમલાના જવાબમાં શરૂ કરવામાં આવ્યું હતું. સેના પ્રમુખના જણાવ્યા અનુસાર, આ અભિયાન માત્ર સૈન્ય કાર્યવાહી નથી, પરંતુ તે ભારતની રાજકીય દ્રઢતા અને ત્રણેય પાંખ (થલસેના, વાયુસેના અને નૌસેના) વચ્ચેના શ્રેષ્ઠ સંકલનનું પ્રતીક છે.
તેમણે ઉમેર્યું કે, “આ ઓપરેશન દ્વારા અમે સાબિત કર્યું છે કે ભારત પરંપરાગત યુદ્ધના મેદાનમાં પણ પાકિસ્તાનને હરાવવાની ક્ષમતા ધરાવે છે. અમે પાકિસ્તાનના એ ભ્રમને તોડી નાખ્યો છે કે તેમની પરમાણુ શક્તિ ભારતને મર્યાદિત રાખશે.” રિપોર્ટ મુજબ, આ ઓપરેશન દરમિયાન ભારતે પીઓકેમાં આતંકવાદી શિબિરો પર સર્જિકલ સ્ટ્રાઈક જેવી જ તીવ્રતાથી હુમલા કર્યા હતા, જેમાં અંદાજે 100 જેટલા આતંકવાદીઓનો સફાયો કરવામાં આવ્યો હતો.
વર્ષ 2025 ના સુરક્ષા ડેટા શેર કરતા જનરલ દ્વિવેદીએ નીચે મુજબની મહત્વની બાબતો રજૂ કરી હતી:
આતંકવાદીઓનો સફાયો: 2025માં અત્યાર સુધીમાં કુલ 31 આતંકવાદીઓ માર્યા ગયા છે, જેમાંથી 65% પાકિસ્તાની મૂળના હતા.
સ્થાનિક આતંકવાદ ભરતીમાં ઘટાડો: જમ્મુ-કાશ્મીરમાં સ્થાનિક યુવાનોની આતંકવાદમાં જોડાવાની પ્રક્રિયા લગભગ શૂન્ય થઈ ગઈ છે. વર્ષ 2025માં માત્ર બે જ કેસ નોંધાયા છે.
ઓપરેશન મહાદેવ: પહેલગામ હુમલાના ત્રણ મુખ્ય સૂત્રધારોને સેનાએ ઓપરેશન મહાદેવ હેઠળ ઠાર કર્યા છે.
નિયંત્રણ રેખા (LoC) પર દેખરેખ: હાલમાં સરહદ પાર આઠ જેટલા આતંકવાદી લોન્ચ પેડ્સ સક્રિય હોવાના ઇનપુટ્સ છે, જેના પર સેનાની ચાંપતી નજર છે.
‘ટેરરિઝમ ટુ ટુરિઝમ’: જમ્મુ-કાશ્મીરમાં બદલાતી પરિસ્થિતિ
સેના પ્રમુખે કાશ્મીરમાં વધી રહેલા પ્રવાસન અને વિકાસ પર ભાર મૂકતા કહ્યું કે રાજ્ય હવે આતંકવાદના ઓછાયામાંથી બહાર આવી રહ્યું છે. આ વર્ષે 4 લાખથી વધુ શ્રદ્ધાળુઓએ શાંતિપૂર્ણ રીતે અમરનાથ યાત્રા પૂર્ણ કરી છે, જે છેલ્લા પાંચ વર્ષની સરેરાશ કરતા ઘણી વધારે છે. આ બદલાવ દર્શાવે છે કે સામાન્ય જનતાનો સુરક્ષા દળો અને વહીવટીતંત્ર પરનો વિશ્વાસ વધ્યો છે.
ચીન સાથેની વાસ્તવિક નિયંત્રણ રેખા (LAC) અંગે વાત કરતા તેમણે જણાવ્યું કે લદાખ અને અન્ય સેક્ટરમાં સ્થિતિ હાલ સ્થિર છે. વિશ્વાસ નિર્માણના પગલાં (CBM) દ્વારા તણાવ ઘટાડવાના પ્રયાસો ચાલુ છે, પરંતુ ભારત કોઈ પણ સંજોગોમાં તેની પ્રાદેશિક અખંડિતતા સાથે બાંધછોડ કરશે નહીં.
જનરલ ઉપેન્દ્ર દ્વિવેદીએ વડાપ્રધાનના ‘જય’ મંત્ર (સંયુક્તતા, આત્મનિર્ભરતા અને નવીનતા) ને ટાંકીને જણાવ્યું કે ભવિષ્યના સંઘર્ષો માત્ર સેના જ નહીં, પરંતુ સમગ્ર રાષ્ટ્રીય અભિગમથી જીતાશે. ઓપરેશન સિંદૂર (Operation Sindoor) ના માધ્યમથી ભારતે વિશ્વને સંદેશ આપ્યો છે કે નવી દિલ્હી હવે રક્ષણાત્મક નહીં પણ સક્રિય સુરક્ષા નીતિમાં માને છે.
