વડાપ્રધાન નરેન્દ્ર મોદી આગામી 11 અને 12 જાન્યુઆરીના રોજ પોતાના હોમ સ્ટેટ ગુજરાતની બે દિવસીય મુલાકાતે આવી રહ્યા છે. આ પ્રવાસ દરમિયાન તેઓ રાજકોટમાં ભવ્ય રોડ-શો અને ‘રિજનલ વાઇબ્રન્ટ સમિટ’નું ઉદ્ઘાટન કરશે, જ્યારે અમદાવાદમાં આંતરરાષ્ટ્રીય પતંગોત્સવ અને ફ્લાવર શોની મુલાકાત લેશે. પીએમની મુલાકાતને પગલે વહીવટી તંત્ર અને ભાજપ સંગઠન દ્વારા તૈયારીઓ તેજ કરી દેવામાં આવી છે.
રાજકોટમાં શક્તિ પ્રદર્શન અને વિકાસના મંત્રો 11 જાન્યુઆરીના રોજ વડાપ્રધાન સૌરાષ્ટ્રના પાટનગર રાજકોટથી પોતાના પ્રવાસની શરૂઆત કરશે. જૂના એરપોર્ટથી મારવાડી યુનિવર્સિટી સુધીના અંદાજે 1 કિલોમીટર લાંબા રૂટ પર પીએમ મોદીનો ભવ્ય રોડ-શો યોજાશે. આ રૂટને ભારતીય સંસ્કૃતિની ઝાંખી કરાવતી થીમથી શણગારવામાં આવશે, જ્યાં લાખોની જનમેદની ઉમટી પડે તેવી શક્યતા છે.
ત્યારબાદ, તેઓ મારવાડી યુનિવર્સિટી ખાતે ‘સૌરાષ્ટ્ર-કચ્છ રિજનલ વાઇબ્રન્ટ સમિટ’નું વિધિવત ઉદ્ઘાટન કરશે. આ સમિટમાં રશિયા, જાપાન અને યુક્રેન સહિત ૨૨થી વધુ દેશોના પ્રતિનિધિઓ ભાગ લેશે. સ્થાનિક MSME ઉદ્યોગોને વૈશ્વિક મંચ પૂરું પાડવાના આશય સાથે યોજાનારી આ સમિટમાં અબજો રૂપિયાના રોકાણો આવવાની અપેક્ષા છે.
અમદાવાદમાં સાંસ્કૃતિક ઉત્સવોની રોશની પ્રવાસના બીજા દિવસે એટલે કે 12 જાન્યુઆરીએ વડાપ્રધાન અમદાવાદની મુલાકાત લેશે. સાબરમતી રિવરફ્રન્ટ પર તેઓ ‘ઇન્ટરનેશનલ કાઇટ ફેસ્ટિવલ’ (આંતરરાષ્ટ્રીય પતંગોત્સવ)નો શુભારંભ કરાવશે. આ વર્ષે પતંગોત્સવમાં જર્મનીના ચાન્સેલર પણ હાજર રહે તેવી શક્યતા છે, જે ભારતની વધતી જતી રાજદ્વારી તાકાતનો પુરાવો છે. પીએમ મોદી રિવરફ્રન્ટ પર જ યોજાયેલા ‘ભારત એક ગાથા’ થીમ આધારિત ફ્લાવર શોની પણ મુલાકાત લઈ શકે છે.
ઉલ્લેખનીય છે કે, પીએમ મોદીની આ મુલાકાત માત્ર સાંસ્કૃતિક ઉત્સવો પૂરતી સીમિત નથી, પરંતુ તેઓ રાજ્યના મેટ્રો રેલ ફેઝ-2 અને બુલેટ ટ્રેન જેવા મહત્વકાંક્ષી પ્રોજેક્ટ્સની પ્રગતિની પણ સમીક્ષા કરશે.
