રાજ્યમાં શિયાળાની જામવી જોઈતી ઠંડીને બદલે આ વર્ષે મેઘરાજાએ દસ્તક દેતા જનજીવન પ્રભાવિત થયું છે. વર્ષ ૨૦૨૫ના અંતિમ દિવસોથી શરૂ થયેલો વાતાવરણનો પલટો નવા વર્ષની શરૂઆતમાં પણ યથાવત રહ્યો છે. હવામાન વિભાગની આગાહી મુજબ, આગામી ૪૮ કલાક હજુ પણ રાજ્યના અનેક વિસ્તારોમાં હળવાથી મધ્યમ વરસાદી માહોલ રહેવાની શક્યતા છે, જેને પગલે કૃષિ વિભાગે ખેડૂતો માટે ખાસ એડવાઈઝરી જાહેર કરી છે.
હવામાન વિભાગના અમદાવાદ કેન્દ્રના ડાયરેક્ટર એ.કે. દાસના જણાવ્યા અનુસાર, વેસ્ટર્ન ડિસ્ટર્બન્સની અસર હેઠળ ઉત્તર ગુજરાત, સૌરાષ્ટ્ર અને કચ્છના વિસ્તારોમાં વાતાવરણમાં મોટો ફેરફાર જોવા મળી રહ્યો છે. ખાસ કરીને પાટણ, બનાસકાંઠા, જામનગર, મોરબી અને દ્વારકા જેવા જિલ્લાઓમાં હળવા વરસાદની શક્યતા છે. આ ઉપરાંત, દક્ષિણ ગુજરાતના સુરત, તાપી અને વલસાડ સહિતના પંથકોમાં પણ કમોસમી વરસાદી માહોલ જોવા મળી શકે છે.
સામાન્ય રીતે નવેમ્બર-ડિસેમ્બરમાં અનુભવાતી કાતિલ ઠંડી આ વખતે ગાયબ છે. પારો ગગડવાને બદલે વાદળછાયા વાતાવરણને લીધે મિશ્ર ઋતુનો અનુભવ થઈ રહ્યો છે. જોકે, વરસાદી સિસ્ટમ પસાર થયા બાદ તાપમાનમાં ૨ થી ૪ ડિગ્રીનો ઘટાડો થતા ઠંડીનું જોર વધી શકે છે.
ખેડૂતો માટે માર્ગદર્શિકા કમોસમી વરસાદને કારણે રવિ પાકને નુકસાન થવાની ભીતિ સેવાઈ રહી છે. આ ગંભીરતાને ધ્યાને રાખી રાજ્યના કૃષિ વિભાગે ખેડૂતોને તૈયાર પાક સુરક્ષિત સ્થળે ખસેડવા અને માર્કેટિંગ યાર્ડમાં રાખેલા અનાજને તાડપત્રીથી ઢાંકવા જેવી સાવચેતી રાખવા સૂચના આપી છે. ૦૧ જાન્યુઆરી, ૨૦૨૬ સુધી આ અનિશ્ચિત વાતાવરણ જારી રહેવાની સંભાવના હોવાથી ગ્રામ્ય વિસ્તારોમાં વહીવટી તંત્ર પણ સતર્ક બન્યું છે.
